
viernes, 5 de febrero de 2010
Moitas grazas!

miércoles, 3 de febrero de 2010
Concerto para a Paz e a Solidaridade

CONCERTO PARA A PAZ E A SOLIDARIDADE
Día: XOVES, 4 DE FEBREIRO
Hora: ás 20 horas (8 da tarde)
Lugar: Salón de Actos do Centro Sociocultural de Monterroso
Como sabedes, o día 30 de xaneiro foi o Día Internacional da Paz e, con ese motivo, a Escola Municipal de Música de Monterroso organiza este concerto que terá como lema a paz e a solidaridade. Pretendemos recadar fondos para Haití, que ademais de ser un país asolado pola catástrofe, é un dos países máis pobres do mundo e agora mesmo vive en tensión pola falta de víveres, producíndose conflitos e matanzas no que queda das súas rúas. Recordaremos a países que sufriron e sofren continuas guerras e a aqueles nenos que conviven a diario con explosións que lles poden causar a morte, algo que para eles xa non é extraño.
A música non entende de raza, color ou condición; a música é a linguaxe universal; a música é a voz da esperanza e fai que ata nos momentos máis difíciles esbocemos un sorriso; a música é arte; a música é unha forma de expresarnos; a música é paz, igualdade e solidaridade, os piares para construír un mundo mellor, os valores que intentamos transmitir aos nosos alumnos.
Con este concerto, queremos mandar unha mensaxe de esperanza a todos aqueles países que están sufrindo un conflito bélico, a todas as persoas do mundo que fan fronte á máis mísera pobreza, a todas as persoas do mundo que o perderon todo, como os cidadáns de Haití.
Hai uns días, entre escombros, ruínas, mortes e miseria, vimos unhas imaxes duns nenos que foron recollidos nun campamento improvisado, porque perderon a súa familia; rodeados daquel inferno, unha cooperante púxose a cantar con eles, enseguida lle seguiron e cantaron e bailaron intentando esquecer o sucedido. Seguía a tristeza nos seus ollos, pero á vez que cantaban e se movían, deixaban aparcada por un instante a soidade, era o seu berro de esperanza. A música fixo que eses nenos puideran vivir un momento cheo de ledicia, dentro da máis triste amargura.
Engadiremos o recadado nestes días á conta que abriu o Concello de Monterroso para esta causa, colaboración que se enviará a Médicos Sen Fronteiras e coa que seguro axudaremos a levantar a Haití. Moitísimas grazas pola axuda, estou segura de que coa nosa aportación salvaranse moitas vidas e farémoslles a vida un pouquiño máis agradable.
Dende aquí, mandámoslles toda a nosa forza para saír adiante, aos haitianos e a moitos outros cidadáns do mundo que non pasan por un bo momento.